Friday, December 28, 2012

ZzzZzz


Várra ovdal Ođđa jagi berrešii veahá árvvoštallat mo manai dan jagis. Sihke dan dáfus mo manai muinna ja muđuige. Muhto in gal vuos gille dán birra čállit. Soaitit juste ovdal Ođđa jagi čálán dan birra. 

Na... galggan oaidnit makkár mielas lean.... Soaitit in obbage gillenge árvvoštallat ... 

Na juo... Buorre idja!  :) 

#Diehtojuohkin #Nuvttádiehtojuohkin


Dán filmmažis lea mu buorre olmmái Matyas. Oahpasnuvven suinna jo 4 jagi dássai dáppe Guovdageinnus. Dan maŋŋá deivvadeaimme iešguđetge báikkiin maŋgii.

Ja Dá lea su ođđa prošeakta. :)

Thursday, December 20, 2012

Murmánska guvernera sápmelačča vuostá

Ii ge politiijat, ii ge Guorahallanlávdegoddi eai gávdnan sivaid áššáskuhttit sápmelačča. Maŋŋá guovtti mánu ášši Guvernera sápmelačča vuostá čielgai ja heittihuvvui. 


Murmánska fylkka guvernera návdii buot Guoládaga sámiid suollemasbivdin. Sápmelaš Andrej Danilov ii gearddan dása, vuosttaldii artihkkalisttis. Dát fas suhttadii eiseválddi.  Badjelaš guokte mánu lea leamaš dát ášši guorahallamiid vuolde. 


Ášši duogaš
Ášši lei nie ahte Murmánska fylkka guvernera dahje fylkkamanni Marina Kovtun váidalii  sápmelačča guovlopolitiijaide. Politiijat leat álgán guorahallat ášši  álgogeahčen golggotmánu. 
  
Váldosivvan dasa manne guvernera dagai dán lei artihkal - smiehttamuš dahje kronihkka čállus maid čálii Andrej Danilov. Artihkkalis Danilov hui rahpasit árvvoštalai čoahkkima mas ledje searvan Stáhtaministar- Medvedev, Murmánska fylkka guvernera Kovtun, ja eará alladássi eisseválddit. 
Dán čoahkkimis lei sáhka earet eará  guoleeriid sápmelaččaide. 

Iežas sáhkavuorus Murmánska fylkka guvernera Kovtun celkkii earet eará nie:
- ...sii (sápmelaččat) čohkket ovttas, bálkkáhit suollemasbivdi, dát manna fatnasiin joganjálbmái mii lea 100-200 km:is eret gáttis ja bidjala 800 mehtera guhku firpmiid, ja dat luossat, maid galggaše mannat gođđosadjái, dieđus, ollislaččat darvánit dáidda (firpmiide)...(originála ruoššagillii sáhttá lohkat das http://government.ru/stens/20625/)

Sivvahalla guvernera
Andrej Danilov, gii lea sámi aktivista, "Guoládaga Sámedikki" nubbijođiheaddji iežas artihkkalis válddii mielde moadde media artihkkala  maid ledje čállán dán čoahkkima birra. Dasa lásiin válddii mielde preassadieđáhusa maid čálii Murmánska fylkka guvernera mediagulahallanossodat. Dasto válddii mielde artihkkalii juridihkalaš čilgehusa maid dagai OOSMO sámesearvvi jurista. 
Ja loahppas Danilov ovdan buvttii iežas oaidnu ja čilgehusa. Namalassii Danilov deattuhii ahte guvernera dán čoahkkimis baicce ovddastii business. 
- Dá ii leat imáš. Danne go juste Ponoj johkii son (guvernera Kovtun) láve bivdit guliid (luosaid). Ja nammasaš fitnodat "Ponoj" lágida sutnje daid tuvrraid. 
Maiddái Danilov čuoččuhii artihkkalis ahte Murmánska fylkka guvernera Marina Kovtun atná iežas bargosaji vai oažžut buriid alccesis. 

Golggotmánus Juovllamánui guorahallmat. 
Dát artihkal šattai ge vuolggasadjin politiijaguorahallamiidda. Beannot vahkku maŋŋá politiijat eai gávdnan maidege artihkkalis man dihte livččii vejolaš áššáskuhttit sápmelačča. 

Skábmamánu loahppas Danilov čállá Twitteris: 
- Čuojahedje Guorahallanlávdegottis (investigative committee) ja muitaledje ahte ášši geigejuvvon dáidda. Mun galggan boahtit jearahallamii. 

Ášši jaskkodii. Mediain eai gullon beare ollu dan birra. De fas ealáskahtii digaštallan. Dalle Guvernera Kovtun mielbargi lohka Flashnord neahttasiidui: 
- Čoavddus dán áššis lea álki: son (Danilov) bealušta Marina Kovtun ovdii gielisvuođa ovddas maid čálihii Interneahtas. 

Dása Andrej Danilov vástidii ahte son ii leat bargan maidege man ovddas galgá bealuštit Kovtun ovdii. Seammás bovdii Guvernera baicce deaivvadit sámeálbmogiin maid čoahkkenástii mannan vahkoloahppa Lujávrris. 

Viimmát, loahppa! 
Easka ikte eahkedis (19.12.12) bohte lassi dieđut dán áššái maid doaivumis bidje stuorra čoakkis dán áššis.  Nu mo čállá Flashnord Guorahallanlávdegoddi ii gávdnan makkárge sivaid áššáskuhttit Andrej Danilova.  Murmánska fylkka guvernera Marina Kovtun ii leat duhtavaš boađusin. 







  



Wednesday, December 19, 2012

Hjerterått


Vuos dát lea musihkkafilmmaš! Muhto rievtti mielde dá galgá leat álbma TV-ráidu! Mun maid ledjen dás mielde :p Somá oaidnit loahpalaš boađus!  Goas son čájehit TV:as? :D

Dies oainnát ahte mun maid ledjen mielde dán produkšuvnnas :p 

Dá leat fas mu gieđat leigga filbmejuvvon eará produkšuvdnii. 

Amma fárgga šaddan dovddusin ja beakkan? :D 


Tuesday, December 18, 2012

Goddit boazu. Čuvges jurdagiiguin boahttevuođa birra.

Lean jo guokte gearddi geahčan "Å drepe en rein" dokumentára maid ráhkadii Paul Anders Simma. Dokumentára govvida Guoládaga sámiid dilit maŋimuš áiggiin. Lean ieš ge ollu dihten dáid diliid  man birra muitaluvvo filmmas  jo ovdal dán filmma. 

Lea váttis ain gávdnat rievttis sániid vai buorebut čilget daid dovdduid mat leat juste dál. 

In dieđe... Juo, mun álo dihten, dovden, ledjen oahpes dása man birra lea sáhka dán filmmas. Muhto liihka ártet oaidnit dakkár govaid, ja muitalusa TV:as. Dá ii buktá makkárge, ii ovttage positiivalaš jurddaga. Háliidan leat positiivalaččan, muhto go oainnán ná duohtaealligovaid ieža servodaga birra, de jávket visot positiiva jurdagat. 

Dát dokumentára ovddan buktá jur ášši nu mo lea duohtavuođas. Ja dát duohtavuohta suorgaha mu. Mun bálan dan ahte in dieđe maid vuorda iežan boahtte áiggis. Mus lei álo stuorra miella máhccat ruoktot, Lujávrái, ja bargat ieža servodaga várás. Muhto go oainnán dakkár filmma, de čilegasit ipmirdan ahte dilli lea duođalaš sámeservodagas ovtta ladje. Ii ge dušše sámeservodagas dilli lea nu, muhto jáhkán eará álgoálbmogiin maid, mat ásset Ruoššas. 

Leat váttis ja losses dovddut. Ovtta ládje mun galggan máhccat ruoktot, Lujávrái. Ja go logan dán mu Ruošša beal ustibiidda, ahte áiggun Lujávrái, de buohkat lohket: "Ale fal boađe ruovttuluotta! Maid don sáhtát bargat dáppe?"...

Juo, mun ráhkkistan buot eanemusta Lujávrri ja Guoládateatnamiid. Muhto olmmoš ferte goit sáhttit birget, iige dušše birget, muhto maiddái sáhttit bargat lássin juoidá bargat.... Váikko ástoáiggehommaid fuobmát. Nágodit dáiddálašvuođa ovddanit, jna. Olmmoš ii galgga dušše bargat vai birget (nágodit máksit rehkegiid, oastit biepmu), muhto olmmoš galggašii eallit ieža dihtii: gávdnat áiggi juoidá mállet, sárgut, dahje čálligoahtit romána, jna....

In dieđe... mus leat ollu ustibat Ruoššas, Guoladátnjárggas...Muhtimat leat lihkkostuvvan bures ovtta ladje go nágodit dinet dan máđe doarvái ahte sáhttet veahkehit vánnemiidda. Lea dehálaš veahkehit váhnemiidda, go dávjá dáin lea hejos bálkka, fuones dearvašvuohta, iešguđetge váttisvuođat ja muđuige lea buorre árbivierru veahkehit vánnemiidda juohke oktavuođas. 

Nu mo lohken leat ustibat maid dan dahket go sii lihkkastuvvan oalle bures dan eallimis. Muhto juste dáid ustibiid gaskas ii leat ovttaga lujávrilačča. Dahje, juo leat, muhto dat lujávrilaččat leat áiggá barggu dihte ledje fáren stuorra gávpogiidda. Dieppe dávjá dienas ollu buoret, muđui ealas sosiála eallin (kino, barat, teahterat, govvagallerejat, jna.). 

Lujávrris dan meastá ii gávdno. Guovdageainnu ektui Lujávrris mihá unnit kultuvralaš eallin! Guovdageainnus lea maid allalogut  barggohisvuođa, nu mo Lujávrris ja sámiid gaskkas. Muhto goit dáppe Norggabeal sápmelaš ja olmmoš birge, váikko sus ii lea barggu. Ruoššas, Lujávrris dahkat dan obba váttis. Dasa lásiin jugešvuohta... Leat ustibat mat leat mu ovttajáhkkasaččat, muhto dearvašvuođa ektui, ja olggos oaidnit leat logi jagi boarrasat go mun.
Ollu ustibat leat dárvvanan alkoholii, eai birge ii beaivvi ge alkohola haga....Lea váivvi, go nuorat leat veahážii mielde goddime ieža....Gii bat lea sivalaš dás? Olmmoš go ii nágot vuostildit alkohola? Vai lea go stáhta, go ii nágot doallat ieža lohppadusaid, jna?  Čuolbma... Muhtimat leat vuollanan, vuollaneaddje vuostildit, gáibidit, geahččalit buoredit iežas eallima... 

Lihkkus eai buohkat olles áiggi leat juhkame alkohola, ja leat barggu haga. 

Suorgahahtti govvidit oaivis maid son lea vuordime boahtte áiggis...    
  
Maid  sáhtán dán dilis bargat? Maid galggan bargat? Juo, lean sápmelaš Guoládatnjarggas, Lujávrris eret. Lean fárgga gearggame skuvlla dáppe Guovdageainnus...maid dasto galggan bargat? Go ii gávdno barggu maid háliidan bargat...   

Mun lean jo 28 jagi boaris. Ja dovddan iežan jo váibbán ollu jur dan dihte go ii leat makkár ge sullii čielgagova boahtevuođa ektui. 

In dieđe obbage maid galggan bargat jus fas boađán Lujávrái...Juhkat?! Nu mo ollusat dahket Lujávrris? Dan gal in hállit. Bargat Guoládaga Sámi Radios? Muhto dieppe eai sáhte sihkkarstit mange ládje bálkka  ja eará sosiála ortnegiid. Bargat muhtin ruošša medias? In jáhkke dieppe oažžun frija čállit sámeáššiid ektui. Čállit dábálaš áššiid birra? In dan birra mun smiehtan go álgen lohkat journalistaoahpu Sámi allaskuvllas. 


  
Loahpas. "Å drepe en rein"  dá lea ovtta dáin filmmain maid ovddan bukta čielga jurdaga. Obba buorre dokumentára.  

P.S. Lei áigumuš oanehaččat čállit domumentára birra, muhto fáhkka šattai meastá muitalus. :)    

Saturday, December 8, 2012

Skávžžáid birra filmmáš. Videoblog


Skávžžát :p

Dá govva govvida jo boares áiggit! Buori muitui govvejin iežan. Šaddai oalle somás iešportrehta! :p  Muhto dál lean fas nuorat! :D

Friday, November 30, 2012

"Ja dát koloniserenpolitihka dagahii dan, ahte Sápmi dego luoddanii guovtti oassái: Danmárku Sápmái ja Ruošša Sápmái." 

Oassi iezan easseja čállosis masa fuobmái Steinar Pedersen árvoštallamis barggu. 

Thursday, November 29, 2012

Presideanttaevttohasii guoskeavaš giellamáhtu várás dikta-ávžžuhus

Sámás, presideanta! Presideanta, sámás! 
Sámas, presideanta! Presideanta, sámás!
Sámás, presideanta! Sámás! 

              Sámás ruovttus, sámás dieppe, sámás doppe
Sámás juohke áidna beaivi. 
Presideanta, sámás Sámedikkis! 

Presideanta govvan lea ge, lea ge sámeservodaga speadjalus 
Presideanta ovddagovvan lea ge, lea ge dážaservodagas ofelaš

              Sámás ruovttus, sámás mánáidesiiguin.
              Dáppe, doppe, duoppil, dieppil, duoppil - 
              Juohke áidna sajis - sámas! 
              Presideanta, sámás Sámedikkis! 

Presidenta, oaččut hupmat dahje hallat, 
Vai soatit háliidivččet ságastit dahje "supsnestit"?
Ieš dieđát maid don liikot eambbo...
hupmat, hallat, ságastit...
Muhto sámás, presideanta! 
Sámegiella gal lea dehálaš ja mávsolaš!
Sámegiella gal lea ge gollegiella! 


             Sámás, presideanta! Presideanta, sámás! 
             Sámas, presideanta! Presideanta, sámás!
             Sámás, presideanta! 


Sámás.


:) 

Wednesday, November 14, 2012

RAIPON ášši ektui jurdagat.

Lea issoras mii dáhpahuvva maŋimuš áiggiin Ruoššabeal eamiálbmot máilmmis. Dát dilli suhtada mu, ja suhtada dá ahte mun persovnnalaččat in sáhte  dasa mange ládje váikkuhit. Ruošša stáhtá lea stuorramášiidna mii ii beroš ieža álbmogiin maid ásset miehtá Ruošša. Dá leat iešguđet ge álbmogat. 

Lea issoras ja duođalaš dilli. Iige imaš manne dan birra eai jietnat maidege ruoššamediat. Sii han leat maid ožžon direktiivvaid. Eamiálmogiid mediat eai leat nu fámus vai olihit ruošša eisseváldiid. Ruošša riikkamediat mu ipmárdusa mielde eai goassige  muitališgoahtit dakkár áššiid birra no mo dan áiggi dáhpahuvva RAIPON orgánisašuvnnain. Muhto dát ášši lea unná binnaš oasi dán "stuorra gahku váttisvuođaid". Miehtá Ruošša leat láhkorihkomat, eamiálbmogiid vuoigatvuođa rihkomat, jna. Dieppe stuorra gárddin, Kremlinas dušše muitalit man buorre barggu sii leat bargame álbmogiid váras. Dát gal lea njuolgga gielisvuohta. 

Lihkus lea interneahta dán áigge man bokte olmmoš oažžu ođđasiid dávjimusat maŋimuš áiggiin. Lihkus gávdno maiddái RAIPON ášši birra muhtun artihkáliid, oaivviliid, jna. Muhto stuorra ruošša interneahta ektui dát čállosat leat uhcán oassi mediamáilmmis. 

Dain beivviin RAIPON ášši lei maiddái fukusis Sámimediain ja Barentsguovlu median. Erenoamažii odne Ođđasiin lei čielgga signála. Ruoššaeisseválddi ieš ii boahtá maidege komenteret ášši ektui. Bállu? Direktiiva? Dahje leago sutnje áibbas seamma? Muhto buorre go olgoriikkamediat ovddidit dakkár áššiid. Doaivvumis áiggi mielde mii beassat guldalit ruošša eisseváldiid oaidnu RAIPON ášši ektui.   

Ruoššas ásset sullii 140 milliivdna olbmo, daid gaskas álgoálbmogat leat sullii 300 duhát olbmo. Dá lea vuolel 1%. Mo de eamiálbmogat Ruoššas galget nágodit muitalit ieža oaivviliid Ruošša mediaide, Ruošša servodahkii? 

Dá livččii vejolaš diehtálas rievdadit dili, muhto go Ruoššas stivre Putin ja Medvedev lea dego su dohka gieđas. Jáhkku ja doaivva dakkáviđe suddada oaivis. 

Muhto dan ovdal Čečenija guovlu álbmot ledje doarun ieža rivttiid ovddas. Muhto man ladje sii leat doarrun? Heivešii go son dakkár vuohki álgoálbmogiidda odne? Namalassii váldit gieđaide niibbiid, vearjuid, bissuid jna. Dakkár vuohki ii heive, munnje persovnalaččat goit dá ii heive. Bargat demokrahtalaččat, čállit ovtta ladje breavvaid eisseváldiide. Dás ii leat nu ollu ávki...  

Miellačájuhusaid, njealggunákšuvnnaid lágidit seamma ládje nu mo 1978-80 jagiin ledje dahkan sápmelaččat Norggabealde. Hm..hm.. Unná binna Norggas dá livččii vejolaš. Naba stuorra Ruoššas, mo dieppe? Livčče go lihkkastuvvan dakkár daguid dihte álgoálbmogat Ruoššas? Livčče go rievdan ieža oainnuid ruošša eisseválddit eamiálbmogiid ektui?   

Dán dilis in dieđe mo  galggan jurddašit positiivalaččat ja objektiivallaččat RAIPON ášši  ja muđui ge eamiálbmogiid dili ektui. 

P.S.De dál fas áigi máhcan eksámenbárgui. 
P.P.S. Jus fuobmát muhtun čállinmeattahusa, de logat munnje. Dahje čujut gokko dá lea. :) 




     

Sunday, October 28, 2012

Bloggema ja giela birra

Mun jáhkkán dat sosiála mediat sihke Facebook, Twitter ja earát billistit mu movtta danne go in veaja šat blogget álbmaládje nu mo ovdal. Bloggen ii geassut šat mu nu mo ovdal.  Vissa dan dihte go meanddo ollu ja meanddo dávjá lean dáin iešguđetge sosiála mediain online. Muhtumin lean dieppe oktanaga. Dá válddo ollu áiggi, fámut... lohkat dáin mediain váikko man birra. Leat sihke somás ja váives áššit.  Dávjá juoidá gesnu čállistan, iežan oaivvila čállistan, jearaldaga sáhtán jearrat, jna. 

Dávjá čálán sámegillii, in dieđe manne, muhto mu mielas lea dehálaš doallahit giela, ja giela galgá leat oidnosis ii dušše dábálaš sámemediain, muhto maiddái sosiála mediain. Mun ipmirdan dahje ádden bures daid sámiid geat eai máhte sámastit iešguđet sivaid dihte. Ja sidjiide vissa váivi lohkat dan maid mun čálán sámegillii. Dahje soaitit sii eai obage beroš das makkár gillii mun čálán ja man birra.   Muhto diehtalas mun in leat nu jállat čállit dušše sámegillii sosiála mediain.   Mus lea baggu čállit máŋga gillii dan sivas ahte mus leat "olbmát" miehta máilmmi. Sin dihte mus lea baggu dehálaš, dahje áibbas dábálaš jurdagiid čállit maiddái ruoššagillii ja eŋgelasgillii. Dáhje  dárogillii, váikko in leat vuos máhttán nu bures hupmat\hállat ja čállit. Dát lea maid giellahárjehallan čállit dárogillii sosiála mediain. Ja mun ge in beroš vuos goit lean go čállime riekta vai in dárogillii. Dássažii goit ii oktage divvustan mu dárogiela.  Soaitit mun bloggegoađán dárogillii maid muhtin beaivi. 

Juo, go muitán galggan namuhit. Odne ledje sátnejođđiheaddji válggat Lujávrri suohkanis dahje gielddas. Dán háve lei nubbi vuorru. Vuosttáš vuorru birra lea vejolaš guldalit Haloo Sápmi nammasaš prográmmas. Nubbi tuvrras leigga guokte evttohasa. Okta dáin lei ovddeš nubbisátnejođiheaddji ja nubbin evttohasan  fas lei gávpeolmmái. Dássažii eai leat vuos čielgan visot, muhto gáskaboddosaččat vuoitobealde lea gávppeolmmái guhte ovddasta opposišuvnna bellodat "Spravedlivaja Rossija". Dán dáfus lea oba buorre, muhto nubbi dáfus lea váttis árvvoštallat makkár boahtte áigi lea Lujávrri suohkanis. Mun livččen jienostit nuppi evttohasa.. Muhto ja-ja...boahtte háve jienástan go lean Lujávrris. 

Buorre idja, iđit, beaivi! 



  www.facebook.com\gavrilovmedia      

    

Friday, October 26, 2012

Twitter vuohki čállit

#Leaollumiidáhpáhuvvaeallimisahteinásttámaidegečállitdásdahjejuogaditjurdagiid. :p 

Thursday, October 4, 2012

Válgagižžu Sámi allaskuvlla stivrii lea jođus. JIENASTEADDJI GALGÁ DIEHTIT

Ikte álgii válgagižžu Sámi allaskuvlla stivrii. Ja mun ge lean ovtta eavttohasan. Jienastit sáhtet  Sámi allaskuvlla studeanttat geat leat máksán oahppodivvaga. 

Muhto mii fuomaimet olmmáiguin ahte ii son dát oidno man ge ládje ahte leat válggat. Na juo, studeanta oažžu dahje oaččui šleađgaboasta bokte dieđuid: "Dá leat válggat jođus. Dá leat eavttohasat. Jienas fal." 

Muhto ii dát gal geasuha studeantta jienastit. Erenoamážžii ođđa studeanttaide ollu namat sáhttet leat apmasat. Erenoamážžii sin váras eavttohasat galgáše eambbo muitalit ieža birra. Ja muđui ge muitalit manne háliida allaskuvlla stivrii. 

Allaskuvlla stivra lea oba dehálaš orgána maid hukse Sámi allaskuvlla oppalaš politihkka.   Ja lea ge hirbmat buorre go dán stivras leat studeanttaid ovddasteaddjit.  Dán háve mun geahččalan beasat stivrii vai ovddidit buot Sámi allaskuvlla studeanttaid beroštumiid. 
- Rábasvuohta, 
- Veahkkáivuohta, 
- Doaimmalašvuohta
- Gelbolašvuohta
- Máhttolašvuohta
- jna.

Dakkár sánit galget gullet DU EAVTTOHASII. Hás mun dá lean, du eavttohas! 

Danne odne ráhkkadeaimet moadde plákahta.  Dát leat buktán beroštupmi olbmuin. Dá gal lea jo buorre boađus. Maiddái ollusat jearran: makkár válggat dá leat? Mo galgá jienastit? 

JUS LEAT SÁMI ALLASKUVLLA STUDEANTA JA LEAT MÁKSÁN OAHPPODIVVAGA, DE ÁVŽŽUHAN JIENAS MU!  SERGEY GAVRILOV lea DU EAVTTOHAS! Lohpidan ovddidit buot Sámi allaskuvlla studeantaid beroštumiid. 












































Tuesday, October 2, 2012

...

Hallo! Lean fas dáppe  Guovdageainnus. Ledjen beannot vahku eret. Áigi lea čállit dahje ráhkkanišgoahtit  skuvllii. Ferten dan lohkanbájis gárvvet bacheloroahpu journalistihkas. Dát ii leat nu ollu maiguin galggan bargat, muhto dá lea eará dáfus lossát.  Lea lossát ieš álddis  lohkagoahtit daid girjjiid vai bures lahkai birget daiguin eksámenaiguin maid galggan váldit dán lohkanbájis. Muhto ja-ja.. 

Muđui...Odne vihken 5 km. Dá ii leat gal ollu, muhto dan geažil go mus lei beannotvahkosaš vuoiŋŋástan boddu, de lei baggu álgit viehkat 5 km:is.  
Boahtte háve fas lea áiggumuš 8 km viehkat. Galggan oaidnit mo dovddan ieža juolggiid ja muđui gorruda.   
   
Na juo, dát gal lei visot otnážii :p


Tuesday, September 18, 2012

Fearan

Háliidin juoidá čállistit dasa, muhto fas vájálduhttin  jurdaga...De in gille šat čállit. Soaitit maŋŋit. Fárgga fas galggan Thon hoteallas fitnat. Dieppe lea okta deaivvadeapmi. Muđui eai leat mus  beare ollu áššit man birra sáhttá dahje oažžu muitalit. 

Juo. Ovtta ášši goit sáhtán namuhit. Dá giellaoahppagihpa mainna lean bargame galgá leat boahtte vahkku gárves sisdoallu ektui goit. Hápmi gal soaitit rievdaduvva. 

Na de gal lei vissot otnážii. 

P.S. Dát Sámi Stuoramus Bufea mii lágiduvvui mannan vahkkoluohpa galgášii baicce gohčodit Sámi Stuoramus Vuordináigin. :) 

          

Sunday, September 2, 2012

Putin - oanehis dikta

la-la-la
tra-la-la
tro-lo-lo
tro-lo-lo
tra-lja-lja
tra-lja-lja

Putin, manna birru eret! :p 













P.S. Mun in leat lahkage separátista. Baicce lean idealista. :)
Dá lea várra máŋemuš dikta Putina birra. 

Thursday, August 30, 2012

Putin!? Putin?? Putin...

Putin!? Putin?? Putin. Puu-tin...
Ruošša presideantta vai Ruošša gonagas son lea...
Birru Putin. 
Gullo, oidno, čállo juohke áidna beaivi, livččii jearaldat
Riekta, birru Putin dát lea, livččii dása vástádus. 

Putin, Puu-tin. 
Maid? Leat go presideanta don? 
Gii bat jienastan du ovddas?
In gal mun. 

Putin, birru, ale šat stoahkat dego dihtorspealuin lávejit stoahkat soapmasat. 
Putin, heite fal! Dá ii heive dutnje  presideantta virgis leahkit.  

Putin!? Putin?? Putin...Puu-tin...
In boađe vájálduhttit  namma du...

Putin dáppe, Putin dieppe, Putin barggus, álo barggus..
Vuoi dan Putin barga, barga juohke beaivi.
Mátkoštalla, borra, oađđá, bágadalla, ráđđedalla, álo barggus.
Álbmogiid birra smiehtasta...
Dieppe fitna, doppe fitna...álo čáđa áigiid álbmogiid birra smiehtasta. 
Ii dá máhttá Putin vuoiŋŋastit, ii son ásta vuoiŋŋastit
Putin barggus birru lea. 

Putin!? Putin?? Puu-tin...
Maid son galgat vuordit mii? 
Ođđa lágat hutkojuvvojit juohke beaivi...
Na don oažžu bargat, na it oažžu...
báicce nie don galggat bargat...
ávžžuha presidenta lágaid bokte.
Jienas Putin namma ovddas go leat fas dát válgat. 
Dalle don oainnát man buorre šadda. 
Muhto dál gal fertet vuordit..jahki, guokte, golbma... 
ovdal go mun ieš dieđán...
Návddaš eallima, sápmelaš! 
ale beroš, ale stresse! Mii gal ordnet dutnje buriid. 

Putin! Manna birru eret. 






















P.S. Buorre idja! In leat man ge ládje separatista. Baicce veahá idialista :p

Friday, August 3, 2012

Ámma muhtimat vel lávet guovlut mu bloggas? Vai? :) 
Oainnát, lea geassi. Ja dát ii leat buorremus áigi čállimii. Muhto gal fárga lea čákča fas. Dalle gal mun joatkán čállimis bloggai. 

Buori geasi ain dutnje! :)

Friday, July 13, 2012

Dál lean fas páhkeame. Ihttin iđđes dollen Kárášjoga guvllui, Bieskenjárggii. Háliidan vahkku ovdal Márkomeannu álgá vuoiŋŋástit veahá. Seammás gal lea áigi galledit olbmuid dieppe. Guhkkes áigái in leat fitnan Bieskenjárgas. 

Válddán fárrui dihtor vai joatkit smavvá čálálaš prošeavttaid. Soaitán govven juoidá dieppe maid. Ferte oaidnit mo šadda, mii dáhpahuvva. 

Diŋgat maid osten eBay:as eai leat vuos boahtán. In dieđe man guhka vel galggan vuordit daid diŋgaid. 

Ledjen Svolværas, Lofotenis dieppe lei fiinnis. Dá lei fiinna tuvra ja fiinna doalut.  Geahččalin govvet dien tuvras, muhto eai visot govat leat šaddan nu mo mun háliidivččen. Luonddu govaid gal váttis govvet statiiva haga. Ja mun ge in leat váldán fárrui statiiva. Muhto goit dus lea vejolaš geahčat muhtin govaid das: http://www.facebook.com/gavrilovmedia
In hálit šat álmmuhit govaid iežan profiila vuolde. :) Dan dihte ge sirdin govaid eará siidui.

Maid vel? Na ii leat maidege eará maid livččen muitalit.. Geassi lea geassi, váikko muhtumin dálki ii hálit čájehit dan. 











Dán gova lean govven go ledjen vuolgime Svolværas Romssa guvlui. Dá lea vissa skávli. 

Friday, June 29, 2012

Festiválaide

Boahtte vahkku lean vuolgime Lofotonii. Dieppe dollojuvvo okta erenoamáš divrras munnje riegadanbeaivi oktavuođas feasta. Dáinna olbmáin oahppasnuvven máŋga jagi das ovdal. Dalle mun in leat orron dáppe Norga bealde.  Ledjen dušše fitnamin dáppe Norggas muhtun konferánsa dahje festivála oktavuođas, jna. Dá lei vuosttáš gearddi go fitnen Riddu-Riđđus  jagis 2006. Lean illus go dovdan dán olbmo jo nie guhká. 


Šadda somá fitnat Lofotonis. Lofotenis vuolggán ge njuolggá Riddu-Riđđui. Váikko dál maŋimuš jagiin ii leat šat nu somá go dalle. Mun goit lean duhtaváš go lea dakkár festivála. Muhto suddu lea go jagis jahkái gullo unnit ja unnit sámegiela. Ja muđui ge lea dovddu ahte Riddu-Ruđđu lea šaddame dakkár turistaid várás festiválan.   


Dan maŋŋá finan ruovttus, Guovdageainnus. Ja de fas mátkái, Márkomennui! Has, galgá leat somá ja miellagiddevaš. 


In jáhkke ahte orun gillime eará festiválaide fitnat. 


Riddu-Riddu ja Márkomeannu leat deahaleamos festiválat munnje. 



Monday, June 25, 2012

boahtte vahkku hommaid birra

Dan vahku mielde galggan oažžut statiiva ja ovtta objektiiva. Go oaččun dáid, de galggan govvet ovtta báikkis. In hálit vuos namuhit mii lea báiki. De fas vahku loahppas jus visot manna bures, de beasan govvet miessemearkuma. Šadda somá oaidnit loahppas govaid. 

Maiddái lean ain bargame dainna gihpagiin man birra muitalin ovdeš čállosiin.  

Ja dan sivas go in leat ožžon geasebarggu NRK Sámis, de galggan eará sájis ohcat barggu. Livččii dieđus oažžut journalistalaš barggu, muhto gal oainnán makkár barggu gávnnan. Barggu haga gal lea veahá váivi. Maiddái dietnasa haga lea veahá váivi. 

Náhkkarat eai obba ge boahtán. Vuššen gáfe. Galgá vissa idji dá doallat. Bidjen johtui ovtta ruošša filmma. Dás lea namma "Eatnit" jus sámegillii jorgalit. Guhkes áigái in leat geahččan ruošša filmmaid. Dá lea dakkár komedija ja seammás melodrama. Dan maŋŋá joatkán bargat gihpagiin. 

Na juo, sullii nie. 



Thursday, June 21, 2012

Ikte gaskaija áigge gosa nu muhto jávkkai el-rávdnji. Fáhkkestaga jávkkai. Álggus geahččalin juoiddá bargat. Geahččalin gávdnat siva dasa manne jávkkai el-rávdnji. Jávkkai juste dalle go smihten  geahččat Ođđasiid neahtta badjel.... muhto ii dán gal sáhtán dahkat. 


Diibmu geahčen sullii jáddaduvvui dihtor. In ge beassan bargat eará go dušše neahtas guovlut.  Oktii bođii jearaldat: Na maid son galgášin bargat dan dilis go ii doaibmá maidege? Geahččalin lohkat Johana Turi girjji "Muitalus sámiid birra". Dat lea oalle seavdnját ahte in ollen nu guhkas lohkamiin. In áigon billistit čálmmiid.     


Fas viehkalin gávdnama dihte manne ii leat el-rávdnji? De deivven ránnjá. Dá logai ahte sus ii leat el-rávdnji maiddái. Easká dalle mun gal áibbas vuollanin ja in ge gillen eambbo streasset dainna el-rávnnjiin. 


Muhto dál áigi geahččat spábbačiekčankampa. Portugal-Greece. Portugalija-Čekija. Livččen duhtavaš jus Čekija vuoitašii. 

Tuesday, June 19, 2012

Rievdadin namahussa bloggan. Lean ain Guovdageainnus. Mus eai gal leat makkárge erenoamáš áššiid, iige barggu dan áigge. Lean vuordime vástadusa NRK Sámis geasebarggu oktavuođas. Jus in oažžu, de gal soaitán dušše vuoiŋŋastan dan geasi.  Muhto šadda veahá váivvi jus áigumuš fitnat Svalbardas govvema dihtii ii ollašuvva. 

Ovddit vahku rájes lean čuovvume Eurohpa meaštirgilvuid spábbačiekcamis. Oppa  suddu lea go Ruošša joavkku ii leat šat mielde. Vuosttaš kampa čievččai bures. Vuitii 4-1 Čekija vuostá. Mus gal lei jáhkku ahte Ruošša ferte beassat viiddaset. Daid 4 joavku gaskas Ruošša joavkus lei visot vai birget bures. Muhto spábba lea jorbas... Ja-ja. Boahtte háve gal sihkkarit. Mii beassat viiddaset. Nubbi mu fávorihta joavkku seammá go Ruošša ii beassan viiddaset.  Lean áin čuovvume EM-2012 diehtalas, muhto ii nu stuorra mielain go ovdal. 

Finálii galgaba beassat Spanija ja Duiska. Jus Spanija ii beassa, de gal spábbačiekčamis vissa álgá revolušuvdna. 

Maid vel? Dan jagi oalle heajos geasedálki. Juohke beaivvi meastá oalle čoaskkis. Illa lea ge 10+12 lieggagráda. Árvi. Váivves dálki go ii lea makkárge miella juoidá bargat.  Earet go juoidá ruovttus geahččalit bargat. Odne jorgalin moadde gihpaga ja ain lean joatkame bargat ovtta eará áššiin. In dieđe maid loahpas dás šadda. 

Earet vástadusa NRK Sámis lean vuorddime ovtta objeaktiiva maid diŋgojin. Dalle gal beasan eambbo govvet portreahta-ja luonttu govaid. 

Na juo, buorre idja!  

Thursday, June 7, 2012

Juo, dá gal oažžu dadjat lea leamaš produktiiva beaivi, ja ii ge leat vuos nohkkan.  Rievtti mielde lei ollu ášši maid čáđahin. 


Fitnen Seaistin Baŋkus, dilli koartain dakkaviđe čielgai. Osten muntin dárbbašlaš osiid sihkkelii. Dál lea dego áibbas eará sihkkel mus. Suddu go lea árvi, livččen sihkkelastit gosanu dáppe.  


Veahkehin olbmui ovtta áššiin. Maiddái odne čielgai eará ášši. Dá lea barggu Sámi arkiivas oktavuođas. Dá bargufálaldat sirdašuvvui čákčabeallái. 


Dál ii leat eará go vuordit vástádusa NRK Sámis. 


Eahketbeallái lea plána guovlustit Duodječájáhusas maid lágiduvvo Diehtosiidas, ja álgá dii. 18.00 odne. 


Sullii nie.  

Monday, June 4, 2012

Vahkku álgán

Lean álgán veahá bargat ovtta grámmatihkagihpain. Áigá jo smihten ráhkkadit juogálágán veahkkeneavvu ruoššabealstudeanttaidde. Juste dál mus lea čielga konseapta. Dá mo dát gihpa berre leat hábmejuvvot sihke sisdoalu ja hámi ektui. Háliidivččen dieđusge lágamus áigi mielde gárvvet dán barggu. Muhto gal in áiggu šat eambbo dan birra hupmat. 


Dan vahkku mielde galggan bargogoahtit Sámi arkiivas, Diehtosiidas. In vuos gullan ollislaččat barggu birra. Muhto dá leat muhtun jorgalanbarggut ruoššagielas sámegillii. 


Mii bat vel livččii miellagiddevaš muitalit? Na juo veahážii mielde sihkelastišgođii. Soaittán ferten muhtun beaive váldit diibmosaš sihkelastintuvra.   


Dá lea fas okta govva maid válden Rákkasordas go lei sámenuoraid konferánsa. 





Friday, June 1, 2012

GAVRILOV MEDIA

Mearridin goit ráhkkadit sierra diehtojuohkin kánala iežan fitnodahkii. Das gávdnat:  http://gavrilovmedia.blogspot.no/


Buorre iđit musihkahámis


Buorre iđit!

Háliidan jurdilit eanet ja eanet positiivalaččat muhto go čuovvun iešguđetlágan ođđasiidda, de jurdilit positiivalaččat hirbmat váttis. Galggan vissa heaitit geahččamis TV. Dalle boahtá ráfalašvuohta. :) 

 

P.S. Dál jurdilan galggan go sierra bloga ráhkkadit mu fitnodahkii vai lea doarvai ráhkkadit dušše dan bloggas sierra siidu...

Monday, May 28, 2012

Rájehis ovttasbargu

Dá lei váldojurdda sámenuoraid konferánsas mii lei Rákkasordas Ruoŧŧas (24-27.05.12).  Dá lei oktasaš konferánsa mas serve sámenuorat miehta Sámi. Go mun lean Sámi nurash nuoraid organisašuvnna stivralahttu, de mun galgen maid fitnat dan konferánsas. Muđui Ruoššabeal Sámis mii leimmet vissa 16is.  Muhto in áigu geasuhit mu iežan bloggii oaivviliid maid gullet Sámi nurash organisašuvdnii. Jáhkkan fárgga lea vejolaš gávdnat  eanet dieđuid maid bargai Sámi nurash Rákkasordas sin blokkas.  

Mun ieš fuobmajin moadde ášši: 
- lean boarrasnuvvame. Konferánsas ledje ollu olbmot muhto 7-10 jagi nuorabut go mun. :) 
- Dá lei buorre go konferánsa čuovvui alkoholakeahtes prinsihpa. 
- Dáđi báhabut sámegiella gullui hárve. Muhto buorre go dát giella goit muhtun sájin, bargobajin gullui. 
- Galggan oahpat dan dánsa maid liikojit Ruoŧŧabeale sámenuorat  dánsut. In dieđe rievttes namahusa muhto jáhkkan dá lea "salsa".. Dán ferten oahpat :)  

Thursday, May 24, 2012

Ihttin dollen Ruŧŧii, sámenuoraidkonferánsii. Dieppe galggan sotnabeaivái. Nuorat miehta Sámi galget deaivvadit dieppe. 


Maiddái ožžon dieđu odne govvengilvu birra. Mus lea goalmmát sádji. Lean duhtavaš. Vuoittu lea govaid álmmuheapmi stuoremus govvabláđis "Foto&Video" Ruoššas. Suddu go in beassan viiddaset Duiskii.


Ja mis gal lea giđadálki. Govvejin ikte 22 b. miessemánu.




Thursday, May 17, 2012

Odne lei plána govvet vázzintoga Kárásjogas. Muhto ii dát plána ollasuvvai. Ribahin oaððit menddo guhka... Vuoi-vuoi.
Sent from my Nokia phone

Wednesday, May 16, 2012

Govva-gilvu

Manan vahku dahje duon vahku sáddejin vihtta gova Foto&Video bláððái. Dá lea okta stuorra govvabláðði Ruossabealde. Ja sii leat váljen mu govaid ovtta govvagilvui. Dán gilvvus leat guokte oassi. Okta lea sisriikalas, nubbi fas riikaidgaskkasas. Juste dál govat leat beasan sisriikalas gilvui. Dáid gilvvuid lágidit jáhkasaccat. Finála lea gos nu Duiskas. Ja namma dain gilvvuin EISA MAESTRO, jus riekta muitán. Searvan dasa vai oaidnit man buorre dahje man heajos govat mus leat. Sullii borgemánu loahppas dahje ovdal galggan oazzut arvvostallama.

P.S. Mus eai leat dan telefuvnnas buot sámegielbusttavaid.
Sent from my Nokia phone

1,2,3...

Eal leat boahtán nahkarat. Muhto lean nu váibbas. Ihttin lea plána finastit Guovdageainnus.
Sent from my Nokia phone

Wednesday, May 2, 2012

Historjjálaš dáhpáhus

De dál mun sáhtán jođihit iežan govaid ja eará muhtun doaimmaid albma ládje. Go bohten ruovttubáikis Guovdageaidnui, de poastahildus oidnen ovtta reivve. Dá lei reivve mas čuoččui ahte lean regestrerejuvvon "Enkeltpersonforetak GAVRILOV MEDIA". 


Diehtalas dainna mun galggan vel veahá bargat vai oažžut buorre ipmárdusa. Muhto jáhkán ferte manat bures. 





Wednesday, April 11, 2012

Morihišgoađán

Ná de, mus lea vejolaš joatkit bloggemis. Badjelaš guokte vahku ii lean astu mus blogget. Vuos lea leamaš dát Álgoálbmotmediastašuvdnaid riikkaidgaskasaš konferánsa mas mu bargu lei govvet konferánsa ovddas ja seammás čáđahit ovtta oasi eksámenbarggus. Dáinna jáhkkán birgen bures. 


Dasto ledjen ofelaččan ja dulkan Guovdageaidnnu suohkana gussiide. Diehtalas dalle in ollen visot govvet nu mo háliidivččen.  


Buorre vásahusat: 
Govvejin prinsa Albert II ja su eamida Charline (?). Dasalássin mus lea leamaš oanehis dialoga su eamidiin. Dá lei sullii nie: 
Charline: - Hello. 
Mun: - Hello! 


Ná ii han  dat lea leamaš beare čiekŋalis dialoga, muhto goit dál sáhtán dadjat ahte hupmen Monako prinseassain. :p 
Go boarrasnuvvan de beasan goit juoida muitalit iežan áddjuide (mánáid mánáide). 

Beassášfestivála in áigu vuos máidege čállit. Dasa galggan eambbo jurdagiid čohkedit. Muhto sihkkarit čálán juoida. 


Dál lea áigi fas máhccat ruovttoluotta dábálaš ja ráfalaš ealinvuohkái. 







Tuesday, March 20, 2012

Sámeland produkšuvdna ja "neavttárbargu" mearkkášupmi

Otne olbmáin leimme "Sámeland" mánáidráidu filbmenproseassas. Jus oanehaččat dadjat, de "nevttárbargu" lea ollu vázzit  diehko ja dohko, ja čohkkát dan bottus go earáid filbmejit. :D 



Monday, March 19, 2012

Sámepolitihkkar galgá leat oidnosis

Mus lea dovdu ahte Sámi mediain vájlu sáji "analihtalaš produkšuvdnii" ja maiddái mun oainnán stuora ávkin jus sámepolitihkkarat livčče bistevaččat čállán ieža oainnuid politihka birra dahje ieža doaimmaid, bargguid birra blogga hámis sámi mediaruovttusiidduid vuolde. 


Juo, mun dieđán muhtin sámepolitihkkarat lávejit čállit ieža blokkaide. Juo, daid lea vejolaš gávdnat ohcanneahtasiidduid bokte. Muhto dá ii leat nu geassuheaddji vuohki. Dahje go don sihkkarit dieđát "dien politihkkaris lea blogga", dalle gal guovlustat su blokkai. Mun jáhkkán goit ahte jus sii livčče čállán ja ovdanbuktan  ieža jurdagiid omd., NRK Sápmi vuolde, dahje muhtun eará siidu vuolde. Dalle livččii ollu stuorat juovku geaidda háliidit juohkit oainnud.  


Nu goit lea muhtun median Ruoššabealde. 


Maid don jurdilat dan birra? 

Dá ii leat somá

Ikte go ollejin fas Guovdageidnui, de leamašan oalle buori mielas. Muhto fáhkkestaga dá mokta jávkái... Ožžon dieđu facebooka bokte ahte eai lean válddon átnui mu govaid ovtta prošeavttas. Olles 2 govvenbeaivvi ja 1 redigerinbeaivvi. Govvema dihte in vuolggán bargat Kárášjohkii gos mus livččii sihkkaris bálká. Dá lea unnohas mu mielas, bovdehit govvet, lohpidit máksit barggu ovddas, ja loahpas lea nulla... Ja-ja..  

Nei, in gille šat boahtte áigis čálálaš kontravtta haga govvet ja eará bargguid bargat... 

Thursday, March 15, 2012

TWITTER

Juo, juo. Mun lean maid "aktiviiseren" iežan profiila TWITTER:is. 
Dá lea namma mu dieppe: somasmun. Oza fal, jus lea miella ja bija "follow". 



Buorre iđit, Sápmi!

Jurdilin juoidá rievdat bloggas... hámi, ivnniid... Na, galggan veahá eambbo jurdilit maid son sáhtášin bargat. 

Gea! Viđat beaivi dan mánu šattái golbma jagi go mus lea dát blog. Dát gal lea veahá somá. Nu jođanit áigi manna. Ii mus gal lea beare ollu čuovvuleaddjiid, muhto ii daga maidege. Ii fal dan dihte mus lea dat bloga, báicce sámegiela dihte. 

Áigi jugestit iđitgáfe. Buorre iđit olmmái!:)
Govvejin odne iđđes sullii diibmu guđas. 

Sunday, March 11, 2012

De lei veahá "action"

Odne olles beaivi lean leamaš govvenbarggus. Muhto ii fal dušše mun govvejin, muhtun govaide mun ieš bessen.











Friday, March 9, 2012

Ikte mus lei oalle ollu govvenbarggu. Govvejin dansejeaddjjiid. Loahpas galget šaddat "pressebilder" ja plakahtagovat. Galgašin vel odne govvet, muhto dálki geažil ii šaddan odne govvenproseassa. Go odne lea plána olggun govvet. 


Ikte maiddái vuosttaš geardde lea filbmejin iežan lei miella filbmaža bokte sáddet lihkkusávaldagaid buot nissoniidda ja nieiddaide. Suddu go ráhkkadin dán ruoššagillii dušše. Boahtte háve galggan sámegillii juoidá hutkat, omd. go lean ráhkkadeame borramuša. :p 


Maid vel? Na juo. Dán mánus ilbmai máilbmái Š-bláđđi. Leat oalle miellagiddevaččat muhtun artihkkalat. Maiddái fuobmájin muhtun sániid maid in leat gullan ovdal. Dá lea buorre álo juoidá ođđa oahppat. Muhto in mun sáhtte dadjat ahte Š-bláđđi lea mu fávorita bláđđi. Juo, 4-5 jagi das ovdal go mun vuosttaš geardde oidnen dán bláđi de mun smihten "man buorre go lea dakkár bláđđi! Man coola dat lea!" Dalle mun álo vurden ođđa nummira bláđis. Muhto dál lean vissa ieš rievdan. Ii mus gal lea dál seammá reakšuvdna go ovdal. Juo, dat lea buorre go lea dakkár bláđđi ja čáđa sámegillii. Galgašii vel ráhkkadit neahttasiidu, dalle gal livččii máilbmi buorre dáhku! Muhto dat gal lea ruhta duohken ja eará rešursaid duohken. 


Fargga galggan vuolgit hárjehallat. Dáppe Diehtosiidas. 

Tuesday, March 6, 2012

Boradanboddu

Ikte eahkedis fas ledjen ráhkkadeame borramuša ommana siste. Maŋimuš áige liikon olu ráhkkadit biepmu ommana siste. 


Dađibahábut ii mus lean bohccobierggu... danin fertejin atnit dat bierggu maid osten Remas.  


Jus háliidat ráhkkadit diekkár borramuša, de don dárbbašat:
1. Sullii 1 kg bierggu 
2. 2 shampinjona
3. 1 lávki 
4. salti ja bihppor
5. Omman ja elravdnji 


Dás oainnát muhtin "steps". 


Dá leat bihppor ja "Kjøtt&Grill krydder" 


 Dás oainnát juo čuhppojuvvon bierggu unná bihtáidde. Go leat čuohppan, de bija dáid biergobihtáid lihttái maid dábbalaččat anát ommana siste. Dieđusge dan muttus go bijat dáid lihttái, de galggat muitit sálttet, bihpporasit  ja grydderastit.  


 





Go leat jo sáltten, bihpporastin ja grydderastin, de galggat čuohppastit ovtta lávkki ja guokte shampinjonga. Mun gal liikon shampinjongaide olu, danin dávjá biepmu rájkkadeamis anán dáid. 


Go leat bidjan buot lihtái, de oaččut gokčat lihti foliin. Bijat ommanii dan. Ja sullii 1,5 dii. doalla dan ommanis. Galgá leat sullii 170 liegga gráda ommanis. 
De 1,5 dii. maŋŋá borramuš lea giksan. Muhto muite fal garnira ráhkkadišgoahtit sullii 20 min. ovdal go biergu galgá giksat. 
Dán háve gárnira mus lei rissi.  


Leage buorre! :)
Bon Appetit! :)