Monday, May 9, 2011

Čálbmelasset

Dát gal leat boahtán! De gal fas oaidnán visot bures! :)

Dán liŋka vuolde sáhttá geahčat makkár dát leat čálbmelasset. :)
http://www.ray-ban.com/russia/products/optical/RB8667?var=1000

Sunday, May 8, 2011

9 beaivi miessemánu

Dat lea várra dát beaivi mii sáhttá ja ferte gohčodit feastan dahje bássin. 9 b. miessemánu 1945 jagis nogái vearrámus ja stuorrámus soahti Duiska vuosttá. Soviet Lihtu  vuitii. Olbmot viimat besse ráfis eallit, dahje sii álge hukset ođđa eallima.

Miehtá Ruošša, juohke gávpogis, gillažis jna. olbmot ávvudit dán beaivi, muhto seammás dát lea morašbeaivi go ná ollu olbmot leat jápmán dán soađi geažil. Giitan min otná ádjaid ja áhkuid geat dalle go ledje nuorran leat birgen duiskalaččaid vuosttá.  Duođái giitan, go in dieđe mii livččii dáhpahuvvan jus dalle jagis 1945 livččii vuoitán Duiska? ...

Mun in gal riekta dieđe maid lea bargan dalle mu áddja. Muhto goit dieđe ahte oalle máŋga sápmelaččat leat leamaš dán soađis. Ja várra ge mu áddja maid. Go oidnen su oalle ollu iešguđetlágan medaljaid sullii seammálágan go oidno dán govas.

 Nubbi ášši. Lohken odne ovtta dutkančállosa ruoššagiela birra. Oalle artegis dutkančálus. Dutki ávkkastálla manne lea ná stuorra erohus ruoššagiela ja ukrainskagiela gaskas ja eará. Ja son čállá ahte ukrainskagiella lea báicce dát álbma ruoššagiella. Danne go Kiev dát lea leamaš dološ áigge oaivvegávpogin ja Moskva dalle leamaš smavvá gillažin. Jna. Lohká ahte báicce Ukrainas ja Vilgesruoššas leat álbma ruoššat go otná Ruoššas. Na mun galggan veahá smiehtat dán čállosa birra.

In áigo dán birra eambbo čállit. Lea dovdu ahte dát dutkančállus lea dego ruskačállus....

Saturday, May 7, 2011

Sámi journalisttasearvi jáhkečoahkin


Juo, odne dat álgán čoahkin. Ja miellagiddevaš fádda lea leamaš "Sámi medialogut". Dán birra muitalii Johan Ailo Kalstad. Ihttin lea loahpalaš beaivi čoahkimis.

Thursday, May 5, 2011

Váttisvuođat dulkoma :)

Movt dán berrešii dulkot dahje ipmirdit? Dát govva lea váldon Thailandas. Okta oahppes nieida lea fitnan doppe.


Hárjehallamii

Juo, mus lea leamaš guhkes boddu. In lean leamaš hárjehallamis. Dál lea áigi álgit fas. Ferten oaidnit movt dát lihkkastuvva. Juste dál vuolggán oanehis hárjehallamii. Ovtta diimmu dán háve goit.


Niehku dahje plána lea :)

Lean pláneme mátki olgoriikii. Vuos smihten Amsterdama birra, livččii dieđus somá doppe fitnat. Muhto ii fal dán háve. Muhtin eará háve sihkkárit finan. Dál mus leat jurdagat fitnat Barselonas. Ovddit vahku lea leamaš doppe okta oahppes nieida ja nu lei movttet ja illus go finái doppe. Ja musge šattái miella dohko!  Moadde beaivi juo lean  studereme hotellaid, olgobáikiid, muđui gosa sáhttá ja galgá fitnat. Dieđus ii fal okto vuolggan dohko, muhto ovtta čáppa nieiddain. :) Dá galgá šaddat dego dakkár romántalašmátki. :) Jus visot ordnešuvvo, de gal dán mánu máŋimuš vahku mielde vuolggan návddašit fiina dálkin, vuojadit lieggamearas jna. :)













Muhto dát gal lea veahá boahtteáigi. Dássažii galggan bargat skuvlabargguid. :)


Monday, May 2, 2011

Sapmi sessions

Easke gehččen dán ođđa prográmma "Sapmi sessions". Orru hui miellagiddevaš. Muhto galggan čáđa geahččat buot 6  prográma ovdal go sáhtán  árvvoštallat ja bukutit iežan jurdagiid. Dál juo sáhtán deattuhit ahte nuppi prográmmas boađus - lávla "Háliidivččen" orru leamen ahte Niko Valkeapaa stiila mielde dáhkon. Soaitán mun boastut jurdašan, go nuppi olbmo -Kristian Anttila in mun gal goassige gullan ovdal, inge dovdan su musihka. Galggan veahá googlestit su birra. Soaitá sus lea maid sullii seammá stiila go Nikos. Gii diehtá dán...   :)