Odne lohken oba váives ođasášši. Guoladátnjárggas, Lujávrri gielddas "Olenevod" nammasaš boazofitnodagas ávžžuhit dahje baggejit boazodoliid gođđit ieža bohccuid. Fitnodaga váldoolmmoš ja jođiheaddji A. Reizvih čálii dokumeanta maid sáhttá jorgalit eŋgelásgillii dainna lágiin: "Establishing the fees for grazing private reindeer". Váldoulbmil dáinna báhpiriin lea stuoridit boazofitnodaga oktasaš eallu ja lássihit bierggu buvttadeapmi, ná čilgehuvvo dokumeantas ja dan čállá b-port.
Jus boazodoalli háliida átnit Olenevod nammasaš fitnodaga eatnamiid ja guohtumiid ieža eallu dihtii dahje varas, de dát boazadoalli ferte máksit mánosaččat fitnodohkii 1000-2000 rubela juohke áidna bohccos (200-400 ruvnno). Jus boazodoalli lea mielbargi Olenevod nammasaš boazofitnodagas, de oažžu diktit 12 bohcco (!!!) nuvttá fitnodaga eatnamiin ja guohtumiin. Muđui ferte máksit. Fuom.! Boazodoali bálká lea sullii 10000 rubela dahje 2000 ruvnno mánnui. Dát gal lea menddo unnán.
Seammás rievddadusat gusket boazodolliidda - penšuanistaide. Go ođđa njuolgadusaid meilde sis lea lohpi dušše 6 bohcco diktit nuvttá Olenevod nammasaš boazofitnodagas.
Gáldu: B-port.
Historjállaččat Sovjet áige rájes lei nu ahte boazodolliin lei lohpi áibbas nuvttá diktit ieža smávvit ealluid kolhoza ja sovhoza eatnamiin ja guohtumiin. Vissa ođđa váldoolmmoš Olenevod nammasaš boazofitnodagas ii gille joatkit dološ vierru.
Galggan vel čilget ovtta ášši dát olmmoš lea gávppeolmmái. Sutnje boazodoallu ii leat makkárge árbivierru ja son ge ii goassige ovdal gullan boazodollui sogalaččat.
Lihkus Tundra boazofitnodagas jođiheaddji ja stivra čuvvot goit boares vieruid.
No comments:
Post a Comment