Wednesday, July 10, 2013

Okta, guokte, golbma...

Áigi golla, áigi manna...

In muite, muhto gos nie gullen goit dakkár sániid. In muite man oktavuođas. Vai ledje go dat muhtin lávlaga sánit? 

Muhto, muhto... Leat ollusat geat ávžžuhit  "Maid dál?" bachelordokumentára sáddet filbmafestiválaide. Livččii somá dieđus ná dahkat. Muhto ovdal dan berren doaimmahit eaŋgelasgiel "subtitiles"...daid haga in duostta gosage sáddet. Nu ahte dál lea mus oalle stuorra bargu - ráhkaidt daid "subtitiles". Dan barggu oktavuođas sihkkarit boađán dárbbašit veahki...

Muđui gal dat manna bures. In leat hohpuid siste. In leat váivášuvvan makkárge áššiiguin. Hui ráfálaš eallin lea juste dál mus. Luopmu. Geassi. Muhtumin fas lea miella "filosoferet" eallima birra. :) 

Áŋkke sávan buorre geasi dutnje! :) 





Saturday, July 6, 2013

Midnight Sun Marathon 2013

Dat gal lei historjalaš sihke dáhpáhus ja vásáhus mus! :D 

















Thursday, July 4, 2013

Lean buori mielas. :D

Lea nu fiinnis leahkit dáppe Beskkenjarggas. Go lean dáppe Beskkenjarggas, de dovddan iežan dego ruovttus. 

Odne fas vihken. Šattái measta miila. Dál de mus lea áigumuš searvat bealemaratonii mii lea Levis čihčet beaivvi čákčamánus. Ferten oaidnit movt dat šadda. Lea ollu áiggi dieđus dasa. Muhto aŋke boađán hárjehallat, dahje háliidan hárjehallat gitta boahte jagi Saami Ski Race gilvuide. 

Lean hui duhtávaš go logi jagi maŋŋá álgen hárjehallagoahtit fas. Dat lea oba somá. Mun jáhkkán dasa váikkuhedje hui ollu válláštallansáddegat maid NRK láve ordnet. Namalássii hui ollu váikkuhedje čuioggangilvuid oktavuođas sáddegat. 

Mii vel? 
Vaikko lean juste dál dakkár muttus go in hálit maidege vuos bargat, de goit jurddagiid siste lean pláneme iešguđetge doaimmaid maid galgašin čađahit dan jagi.. 

P.S. Muite fal duolle dalle geahččat govaid maid lean almmuheame dan siiddu vuolde - www.gavrilovmedia.com 


Wednesday, July 3, 2013

030713

Geasseluopmu vissa lea mus juste dál. 
Dahje dat lea juste diekkár áigodat go in bárgga maidege. Lean návddašeame eallima. Vuoiŋŋástan, guossastallan ja viegan. Viegan dábálaččat golbma gearddi vahkkui. 
 
Ii leat nu áigá go gergen Bacheloroahpu sámi journalistihkas. Dan geažil 
in dárbbáš streasset dál vuos gosage ja masge. Dieđus leat muhtin áigumušat, muhto in hálit vuos daid birra jietnadit. Gal ferte oaidnit movt dat šaddá ovdal go sáhtán muitalit ;) 

Nu dat lea. 

P.S. Lea nu váttis gávdnat inspirašuvnna bloggemii.... 



Saturday, June 15, 2013

Ande Somby - Samihate



Dat lea unna binna videoprošeakta maid čađaheime dan giđa. Muhto bachelorbarggu geažil ii lean ástu bargat dainna. Ikte gárvejin dan filmmaža. 

Doaivvumis don liikot dasa.

Friday, May 24, 2013

Feará mii...

Guhkes áigái in leat bloggen. Ollu barggu lea leamaš mus. Ii lean ásttu blogget. Ja muđui ge ii lean inspirašuvnna. Muhto goit lea ulbmil ja mihtu doallat dan blogga. Go lean jo ollu jagiid juogadán jurdagiid dáppe.  Vissa čálán fas dáppe go oaččun árvvosániid bachelorbarggus ja sámegieleksámenis. 

Muhto juste dál, ii leat eará go dadjat ahte álgen viehkat olgun. Ovdal lávejin viehkat Diehtosiidda lašmohallanlánjas. Viehkat olgun orru leamen álkit go siste. Ovdal jurddašin áibbas nuppeládje. Gal viehkat lea somá ja hávski go  leat rievttes viehkanskuovvat, fiinna dálki, ja leat ge mihtomearrit.